Hjalti Nordal er tónskáld og fiðluleikari búsettur í Reykjavík. Hann nam fyrst tónsmíðar hjá Snorra Sigfúsi Birgissyni, seinna hjá Guðmundi Hafsteinssyni í Tónlistarskóla Reykjavíkur þar sem hann lauk stúdentsprófi í tónsmíðum og svo hjá Atla Ingólfssyni og Einari Torfa Einarssyni í Listaháskóla Íslands þar sem hann útskrifaðist með bakkalárgráðu í tónsmíðum vorið 2020.

Hjalti hefur fengið verk sín flutt af samnemendum og atvinnumönnum bæði hér heima og erlendis. Árið 2014 var bar hann sigur úr býtum í tónskáldakeppni fyrir ung tónskáld á vegum Berlínarfílharmóníunnar og fékk verk sitt Strengjatríó flutt af meðlimum hljómsveitarinnar á sérstökum tónleikum og opinberum kammertónleikum hljómsveitarinnar. Sumarið 2019 spilaði Sinfóníuhljómsveit Íslands verk eftir Hjalta inn á upptöku og árið 2020 var hann valinn í Yrkju, tónskáldasmiðju á vegum SÍ og Tónverkamiðstöðvar. Þar fékk hann að skrifa þrjú verk fyrir hljómsveitina og var eitt þeirra flutt opinberlega á lokatónleikum Yrkju vorið 2021. Árið 2021 var Hjalti einn þátttakanda fyrir hönd Íslands á Ung Nordisk Musik í Árósum með verkið Umbót fyrir kór og hljóðfæri. Hjalti mun aftur taka þátt á UNM á næsta ári með hljómsveitarverkið Es ist nichts. Hjalti er staðartónskáld Sumartónleika í Skálholti árið 2023.